நாட்டுப்புற கலைகளில் காளியாட்டம்

• தமிழர்களின் நாட்டுப்புறக்கலைகளில் இதிகாச நிகழ்வுகளை நிகழ்த்தக்கூடிய கலைகள் ஏராளம் உண்டு. 

அவற்றில் காளியாட்டமும் ஒன்று. தமிழர்களில் பெரும்பாலானவர்களுக்கு நாட்டுப்புறக்கலைகள் தொடர்பாக அறிந்திருக்க வாய்ப்பே இல்லை. தமிழ்நாட்டில் தஞ்சாவூர், கும்பகோணம், ஆடுதுறை, திருப்புவனம், திருமங்கலக்குடி, திருவிடைமருதூர், சாத்தனூர், அப்பாசமுத்திரம், தேப்பெருமாநல்லூர், திருப்பனந்தாள், திருச்சிமாவட்டத்தில் கீழ்ப்பமூர், கோடாலிக்கருப்பூர், ஸ்ரீபுரத்தான், உடையார்பாளையம், ஜெயங்கொண்டம் ஆகிய ஊர்களில் திருவிழாக்காலங்களில் காளியாட்டம் மிக முக்கிய பங்குவகிக்கும். தலையில் கிரீடம், கண்களில் வெளிளியிலாலான கண்மலர், கழுத்தில் நீண்டமாலை, கையில் உடுக்கை, கத்திசங்கு, தலைவிரிகோலம், சென்னிற முகத்தில் வாய் வெளியே வென்னிற கோரைப்பற்கள் நீட்டிய படி தொங்கிய நாக்கும் பெருத்த மார்போடு சிவப்பு, பச்சை சேலை உடுத்து பார்ப்பதற்கு காளிதேவியைப்போலவே தோற்றமளிப்பார். 

காளிளியாட்டம் என்னும் போது வழிபாடு, நம்பிக்கை, மரபு ரீதியாக அல்லது பொழுது போக்கை காரணம் காட்டி தோன்றியிருக்கலாம். காளிவேடம், காளி திருநடனம், காளி வீதிஉலா எனப்பல கொபயர்களில் அழைப்பர். அம்மன் கோயில்களில் மகாபாரதக்கதை தவறாமல் நடக்கும். அப்போது அர்ஜீனன் மகனான அரவானை காளிக்கு பலி கொடுக்கும் நிகழ்ச்சி தொடங்கும். பலிகொடுக்கும் வேடத்தில் நடிப்பவர் காளிவேடமிட்டு ஊரைச்சுற்றி ஆடிக்கொண்டே வருவார். இக்காளிதேவியை ஒருவர் கயிற்றால் இடுப்பில் கட்டிப்பின்புறமாக பிடித்து வருவார். இதன் போது ஊரிலே யாருக்காவது அணங்குபிடித்திருப்பின் அல்லது ஊரில் தீயசக்திகள் இருப்பின் நீங்கி தமது வேண்டுதலும் நம்பிக்கைகளும் நிறைவேறும் என்பது இவர்களின் ஜதீகம்.

கிராமங்களில் பேய் பிடித்து ஆட்டும் பெண்கள் இவரை வணங்குவர். இதன் பின் பேய் போய்விடும் என்பது மரபு. இன்றய நவீன உலகில் இவ்வாறான மரபுக்கே இடமில்லாமல் போய்விட்டது.

பண்டய கிராமத்து கோவில்களில் காளியாட்டம் நிகழ முன் ஆலயத்தின் முன்பாக 25 அடி நீளத்திற்கு மிகப்பெரிய அரவான் உருவம் படுத்திருப்பதைப்போலவும் அதன் அருகே மிகப்பெரிய காளி உருவமும் மண்ணால் செய்வர் பூஜை தொடங்கும் போது காளி உருவத்தின் முன் கோழி ஒன்றைப்பலி கொடுப்பர். பின்னர் அராவனர் உருவத்தின் மேல் பூசணிக்காய் ஒன்றை வைத்து துண்டாக வெட்டி எறிய கோவில் பூசாரி துரோபதை வேடமிட்டு அரவாணனைச்சுற்றிக்கொண்டு தன் மார்பில் அடித்தவாறே பாட்டுப்பாடி ஒப்பாரி வைப்பார்.

                                       இக்காளிவேடம் தஞ்சைமாவட்டப்பகுதிகளில் தான் மிகவும் பிரபல்யம். முரத்திலே செய்யப்பட்ட ஆறு கைகள் அவற்றில் வாள், சூலாயுதம் ஏந்தியபடியே ஆடுவது உண்மையில் மகத்தானதாகும். இவ்வாறு காளிவேடம் போடுபவர்கள் எந்தக்கோயிலில் காளிவேடம் போடுகிறார்களோ அக்கோயிலின் திருவிழாக்கள் தொடங்கிமுடியும் வரை விரதமிருப்பர். தமிழகத்தைப்போன்றே கேரளாவிலும் காளிதேவிவேடமிட்டு ஆடும் விழா நடைபெறுகின்றது.